مروة الزارع فتاة مصرية 31 عاما متزوجة وانجبت طفلين كانت تعاني من سمنة مفرطة استطاعت تخسيس وزنها اكثر من 50 كيلو فى خلال عام بمعدل تقريبي 5 كيلو شهريا بدون طبيب او عمليات تخسيس وشفط الدهون ونحت وشد الترهلات والمزهل بدون رجيم قاسي او حرمان فقط قللت طعامها وصغرت وجباتها نظام شبية لنظام اللقيمات مع رياضة فى الجيم بانتظام ، وهذا برنامجها الغذائي والرياضي الذى اتبعته لانقاص وزنها اكثر من 50 كيلو بدون ترهلات رغم عدم خضوعها لاى عملياتوعن لسانها باللغة العامية تقول: لازم وانت ماشي عالنظام تحط هدفك ادامك وتقول مفيش اكل هيتحكم فيا انا اقوي مش هفضل طول عمري تخين وسخريه من الجميع ومش عارف اعمل ولا البس اللي علي مزاجي لو نفسك في حاجه وانت خلاص خدت اكلك قول انا رصيدي النهارده خلص هاخد بكره في رصيدي الجديد وقول انا مش محروم انا بدوق كل الاكل وياريت تعلقوا اكتر صوره تخان فيها ادامكم ورقه تتلزق عالتلاجه بمغناطيس واكتبوا فيها انا ليه عاوز اخس والتخن سببلي ايه في حياتي واقروها كل ما تدخل المطبخ
لقد اتبعت نظام غذائي يشبه نظام اللقيمات لكن حسب ما هو متوفر فى منزلي بدون حرمان على وجبتين يوميا بكميات صغيره جدا في اليوم وجبتين فطار والغداء حسب الموجود بالمنزل بكميات صغيرة و ما اشتهيي من حلويات اخذه منه ٣٠ جرام والوجبه التالته تكون ثمرتين الفاكهه وكوب زبادي صغير او كوب لبن صغير خالى الدسم، مثال ذلك:
الافطار: لاقيتهم بيفطروا طعميه وفول وعيش، هتاخد ربع رغيف ونص طعميايه ومعلقه فول معملوين بالطريقه العاديه جدا حتي لو الفول معمول بزبده
الغذاء: لاقيتهم عاملين مكرونه بشاميل وفراخ هتاخد قطعه مكرونه قد ٣ صوابع وربع فرخه لو الفرخه صغيره بدون جلد طبعا ولو الفرخه كبيره هتاخد نص الربع والاكل هيكون معمول بطريقه البيت العاديه مش شرط بطريقه دايت، او لو مثلا عاملين عدس ولا بصاره هتاخد ٤ معالق عدس او بصاره ونص رغيف من ابو ربع جنيه وابو نص جنيه يبقي ربع رغيف، او لو طبيخ و رز ولحمه
هناخد مكعب لحمه صغير و٤ معالق خضار و ٣ ارز كله معمول عادي، مع ملحوظه املوا المعلقه بما يرضي الله مش تكبسوها بمقام ٢ انت رقيب نفسك وكله هيأثر فى وزنك
العشاء: الوجبه التالته مهمة واساسية لا تستغني عنها هتكون ثمرتين الفاكهه وكوب زبادي صغير او كوب لبن صغير او اي فاكهه صغننه الحجم مثل العنب هيبقي نص كوب وبالنسبة للبطيخ ممكن تكتر منه الضعف لانه سعراته قليله
ما نشتهيه من حلويات ومشروبات عالية السعرات: لنا في اليوم ٣٠ جرام اي حاجه بنحبها ناخدها في اي وقت من اليوم نهارا ومش لازم تكون حاجه مسكره ممكن لب او شيبسي مثلا بتحب ميجا ايس كريم هتاخد ربعها بتحب شيبسي هتاخد كيس من ابو نص جنيه او حبه من الكيس الكبيرحته كيكه ، بسبوسه ، بوريو ، شوكليت ، مولتو ، اي شئ بتحبوه كل يوم اختاروا حاجه وخدوا منها ٣٠ جرام ، احسبوها بالنظر كده او اقروا الوزن اللي علي المنتج لو الوزن مكتوب وقسموه
كيف السيطرة على الجوع الشديد والشبع باقل سعرات: لمن يقول الاكل قليل ومش هنشبع طبعا مش هتشبعوا هنعمل ايه بقيطبق سلطه مش كبير اوي حلو متوسط كده يتاكل مع الوجبتين بتوعنا اي خضار سلطه بدون زيت وحطوا ملح وتوابل عادي وخل ولمون براحتكوا طبق السلطه ده اساسي مع الوجبه مينفعش نستغني عنه وكل يوم نوعوا الخضار وابتكروا مثلا كرنب خس طماطم خيار بصل جزر بقدونس فجل جرجير كرفس شبت بروكلي بتنجان ني بنجر شكلوا كل يوم الخضار براحتكم بس ياريت محدش يديها خضار كتير زياده عشان عاوزين نخلي المعده تتعود عالاكل القليل وتصغر المعده بعد كام شهر بتصغر وبتتعود عالقليل ومتقدرش تكتر اصلا بعد كده معلش بدايه اي شئ صعبه وهيا دي الاراده
المشروبات: طبعا هنشرب اي مشروب عادي بسكر دايت براحتنا قهوه او نسكافيه بلاك او نعناع او كركديه ينسون او شاي او اي حاجه عشبيه بس الكاكو والنسكافيه ٣في واحد والكفي مكس هيبقوا مره واحده في اليوم يا بلاش لان كلهم سعرات حراريه فكيس النسكافيه ٣ في واحد فيه ٦٠ سعر حراري خدوا بالكم الكريمر بيتخن وكله سعرات
- هام جدا لازم ناخد اي فيتامين مع النظام عشان بشرتنا وشعرنا ومنبقاش مجهدين انا باخد بريجفت زينك واحده يوميا وبنتوجار ٢يوميا او اي فيتامينات متعدده- يجب نشرب كل يوم٣ لتر ميه ومش بنحسب مشروباتنا الاخري من كمية المياة المطلوبة يوميا
- لازم برضه نحاول قدر الامكان ننام بدري ونصحي بدري لان الحرق في النهار اعلي ولأن كمان السهر ممكن يجوع الانسان ويخليه ياكل
الرياضة: لااااااازم يبقي في رياضه كل يوم نص ساعه علي الاقل او ساعه ياريت اللي يقدر يروح الجيم يبقي هايل واللي ميقدرش يجيب فديوهات من عاليوتيوب بتاعه ايروبكس ويعمل معاهم بجد متواصل مش يعمل دقيقه ويوقف الفديو ويروح يعمل حاجه ويرجع يكمل لاء يعمل متواصل او مشي بجري ساعه مشي جاد او مشي هروله ولو جري يا سلام او رقص ساعه اه رقص ساعه متواصله تحفه تحفه بجد ادوها مهرجانات وعيشوا لازم اساسي حاجه من الحاجات دي تتعمل اضعف الايمان المشي السريع ، بس الايروبكس هو الوحيد اللي بيشد الجسم لكل اللي بيسألوا عالترهلات المشي واي شئ تاني هيساعد في الحرق بس الايروبكس هوة اللي بيشد الجسم، فلو معمتلوش رياضه ممكن تخسوا اه لكن بترهل مع الرياضه مفيش ترهلات والخسان اكيد ، وكل اللي بيسأل عن شد البطن او اي منطقه حلكم الايروبكس للمنطقه دي واهم حاجه المثابره والاستمرار والصبر الموضوع محتاج وقت شهور
قياس الوزن: ياريت الوزن يكون كل شهر او كل ١٥ يوم اقل حاجه مش كل يوم نوزن مع ملاحظه اننا ممكن نكون بنخس لكن ثابتين عالميزان وده بيكون صدفه ان جسمنا فيه ميه زياده او حجم العضلات زاد والدهون قلت او الدوره الشهريه متقله الجسم بالنسبه للسيدات يعني طول ما احنا ماشين عالدايت بنخسس حتي لو مبنش في الميزان لان ده بيعمل احباط لناس كتير ميعرفوش الكلام ده
ما هو نظام اللقيمات لتخسيس الوزن سريعا بدون حرمان
